Sa Festa de is Ajajus est un’afestamentu tzivili ispainau giai in totu su mundu. Sa festa no est sa matessi dí po totus, e difatis in Itàlia sa Lèi n. 159 de su 31 de Argiolas dda at fissada su 2 de su Mesi de Ladàmini; imbecis, in àterus logus, a is Ajajus ddus afestant in Cabudanni.
Is patronus de is ajajus, po su chi pertocat sa traditzioni católica, funt is Santus Anna e Gioachinu, mama e babbu de Maria e duncas ajajus de Gesús de parti de mama, chi perou ddus afestant su 26 de su mesi de Argiolas: e difatis, Paba Frantziscu at istabbiliu chi su de cuatru domínigus de Argiolas est sa Dí Mundiali de is Ajajus e de is Antzianus.
Ma cust’afestamentu, candu ddu ant pentzau? Sa Festa de is Ajajus dda ant imbentada in is Istadus Unius in su 1978, candu fiat presidenti Jimmy Carter, sighendi una proposta chi iat fatu Marian McQuade, mama de cuíndixi fillus e ajaja de coranta nebodis. S’idea issa dda iat tenta trabballendi cun is bècius, ca si ndi fiat acatada de su rolu de grandu importu in s’educatzioni de is prus giòvunus.
Duncas, iant fissau su primu domínigu pustis de su Labor Day cument’e sa Dí Natzionali de is Ajajus.
Anca de nosu, in Itàlia, sighendi custas trassas, a is ajajus ant cumentzau a ddus afestai in su 1997; a pustis, in su 2004, is de su comunu de Noceto, in Emília Romagna, po donai prus cunsideru a su valori sotziali de is ajajus, ant promóviu s’iter legislativu in Parlamentu po s’istitutzioni de un’afestamentu natzionali.
Sa ricorréntzia tzivili, duncas, dda ant fissada dónnia annu su 2 de su Mesi de Ladàmini, cument’e “unu momentu po tzelebrai s’importu de su rolu de is ajajus aintru de is famíllias e in sa sotziedadi”.
In prus, sa Lèi at istabbiliu su “Prémiu natzionali de s’Ajaja e s’Ajaju de Itàlia”, chi su Presidenti de sa Repúbbrica donat dónnia annu a dexi ajajus, isceberendi·ddus de un’elencu chi cumpilant sa Cummissioni de su Trabballu e de is Políticas Sotzialis e su Ministeru de s’Istrutzioni, s’Universidadi e sa Circa. In custa data is regionis, is províntzias e is comunis depint promovi eventus po avalorai su rolu de is ajajus.
Non funt medas is chi isciint ca sa Festa de is Ajajus tenit fintzas unu frori ufitziali: est su chi in italianu naraus “nontiscordardimè” e in sardu “origa de topi”, chi est su sinnificu de su nómini iscientíficu aregu “mysotis”, unu frori chi si ndi agatat unu muntoni de genias in totu s’Itàlia.
Norabbonas a totu is Ajajas e is Ajajus de Sardigna!
***
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
