AVIS Barúmini: su 20 de Cabudanni 2024 in Pratza Santu Frantziscu po sa donatzioni de su sànguni
S’AVIS Barúmini fait isciri ca su 20 de Cabudanni 2024 is voluntàrius e sótzius funt a disponimentu, in Pratza Santu Frantziscu in Barúmini, po arrici is donadoris de sànguni.
A donai su sànguni fait brofetu meda, no isceti a chi ndi tenit abbisóngiu, ma fintzas a is donadoris etotu, ca sigumenti depint fai esàminis e vísitas fatuvatu (s’AVIS si ddus fait a indonu), sa saludi insoru dda tenint asuta de controllu prus de is chi no ndi donant.
Eus fueddau cun Marcello Coni, unu de is sótzius de s’AVIS Barúmini, po isciri càncua cosa in prus. “Seus unu grupu de baruminesus impinniaus giai de meda in custa ativitadi”, s’at contau. “Faeus sa regorta de sànguni assumancu tres bortas s’annu, e est una cosa chi faeus cun grandu prexeri. Nci poneus totu su coru, naraus, ca certu, est cosa de importu mannu a agiudai is àterus, ma pruscatotu ddu faeus pentzendi a is sorris e is fradis de s’ísula nosta: cumenti iscieus totus, a dolu mannu sa nosta est una terra aundi funt medas is chi sunfrint de maladias genéticas e no isceti, e duncas su sànguni est una cosa chi serbit. Prus andat mellus sa regorta in totu is comunus de sa Sardigna, prus funt is chi donant su sànguni, e prus funt is chi podeus agiudai e is vidas chi podeus salvai”.
E aciungit una cramada: “Iat a èssiri bellu fintzas a biri is prus giòvunus, acostendi anca de nosu a donai su sànguni: piciocheddas e piciocheddus, benei·ddoi, ca teneus abbisóngiu de s’agiudu de totus! S’abetaus!”.
Duncas, totu is Tzitadinas e Tzitadinus chi podint, funt cumbidaus: andai a donai su sànguni, po salvai àteras vidas!
Po ndi isciri de prus e agiudai a s’AVIS Barúmini, ddus podeis sighiri in:
***
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
