Su Comunu de Barúmini fait isciri ca sa Regioni Sardigna, sa Fundatzioni Barúmini e Trenitalia ant cuncordau su servítziu de trasportu púbbricu, de su Nuraxi de Barúmini a s'istatzioni de Santu Éngiu. Duncas de su 5 de Austu e finas a su 30 de Cabudanni, a arribbai a su situ archeológicu UNESCO at èssiri prus fàtzili, po mori de is cursas noas “trenu-bus”.
De lunis chi benit, Trenitalia at apariciau duas cursas a sa dí (andada e torrada) aintru de cida e una is diis festivas: duncas, in 35 minutus isceti, chene firmadas, is bisitadoris ant a pòdiri andai deretus de s'istatzioni a su Nuraxi comporendi unu billetu únicu.
Totus is chi ant partetzipau a s'atóbiu cuncordau po sa presentada de su servítziu funt prexaus meda. Po sa Fundatzioni de Barúmini e de su Diretori Emanuele Lilliu s'acórdiu cun Trenitalia est de importu mannu, ca donat sa possibbilidadi de bisitai is situs archeológicus de sa bidda fintzas a chi no tenit màchina, e no ndi bolit pigai una a pesoni. Sa Diretora Regionali de Trenitalia Francesca Caradonna est de sa bidea ca Barúmini Link est una manera de avalorai su territóriu e su situ UNESCO; imbecis Valentina Uras, Diretora regionali de is Museus Natzionalis po sa Sardigna, at narau ca sa melloria de su trasportu est un’isceberu de importu po fai de manera chi su Nuraxi tèngiat su piessignu de situ UNESCO.
A parri de su Síndigu de Barúmini, Michele Zucca, su progetu at a afortiai is políticas de isvilupu territoriali chi tenint sa punna de donai servítzius, agiudendi is possibbilidadis de trabballu de is giòvunus de sa comunidadi e s'economia. Rossana Podda, de s'Assessorau a su Turismu, in is saludus a s’acabbu at arregordau s'interessu de sa Regioni Sardigna a pitzus de custas intiziativas, narendi chi custu est su cumentzu isceti e tocat a non si firmai, e chi s'Assesorau a su Turismu sigat a trabballai impari a su de su Trasportu e de sa Cultura.
Agatais sa noba in is situs internet de su Comunu de Barúmini, de sa Funtzatzioni Barúmini e fintzas de Trenitalia:
***
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
