Avisu púbbricu "Mesura Nius a Indonu"
Su Comunu de Barúmini fait isciri a totu is tzitadinas e tzitadinus ca at pubbricau s'avisu púbbricu "Mesura Nius a Indonu", e ca ddoi at tempus finas a is 11:59 de noti de lunis 5 de Austu po intregai sa domanda.
Podint partetzipai totu is famíllias, mancai cun unu genidori isceti, e fintzas is chi bivint impari (famíglias de fatu) de assumancu ses mesis, chi tenint unu valori de rédditu ISEE prus bàsciu de € 40.000, e chi tenint is piessignus chi sighint:
- tènniri in càrrigu, po su chi pertocat sa situatzioni fiscali, unu o prus fillus de 0 a 3 annus, fintzas in adotzioni e afidu;
- ai presentau a s'INPS sa dichiaratzioni ISEE; a chi no tenit un'ISEE vàlidu podit fai una auto-dichiaratzioni aundi narat ca su valori de s'ISEE no est prus artu de € 40.000 e su Comunu at cunsiderai sa domanda "cun riserva", impari a cussas chi tenint un’ISEE de € 30.000 a € 40.000;
- ai presentau sa domanda "Bonus nidi INPS" chi atestit su deretu a su contribbutu; si no est possíbbili ammostai su contribbutu "Bonus nidi INPS", su Comunu at a arriciri a su própiu sa domanda "cun riserva" e dda at a pònniri in graduatória donendi·ddi su valori prus artu po s'ISEE alliongiau.
A is famíllias chi ndi tenit deretu, ispetat unu contribbutu de:
- € 2.200 de pratziri in 11 mesis po s'annu 2023, po is chi tenint un’ISEE prus bàsciu de € 30.000;
- € 1.833.37 de pratziri in 11 mesis po s'annu 2023, po is chi tenint un’ISEE chi andat de € 30.001 a € 40.000.
Su contribbutu est carculau in custa manera: de su costu de su niu tocat a ndi bogai su contribbutu "Bonus nidi INPS”, e su chi abarrat est su contribbutu “Nius a indonu” de sa RAS.
In su costu de su niu ddoi est fintzas su costu de s'iscritzioni.
Is domandas si podint intregai umperendi su módulu A alliongiau a s'avisu de su Comunu impari a una cópia de su documentu de identidadi de su chi fait sa domanda, siat su babbu o sa mama o su tutori legali, in una de is maneras chi sighint:
- a manu, in busta serrada, in sa cascita postali chi est a foras de su Comunu in bia Santu Frantziscu, 5 iscriendi cument’e ogetu "Misura Nidi Gratis - Primo semestre 2025" e su nómini de chi fait sa domanda;
- cun sa posta eletrónica certificada (PEC) a s'indiritzu protocollo.barumini@pec.comunas.it, iscriendi cument’e ogetu "Misura Nidi Gratis - Primo semestre 2025" e su nómini de chi fait sa domanda;
- cun sa mail a s'indiritzu protocollo@comune.barumini.ca.it, iscriendi cument’e ogetu "Misura Nidi Gratis - Primo semestre 2025" e su nómini de chi fait sa domanda.
A sa domanda tocat a alliongiai:
- fotocópia de su documentu de identidadi vàlidu;
- certificatzioni ISEE vàlida (annu 2024, redditus 2023);
- documentu chi provit de ai presentau sa domanda a s'INPS po su contribbutu Bonus Nidi INPS;
- comunicatzionis de pagamentu mensili de su Bonus INPS;
- IBAN de sa posta o de banca;
- recidas de is pagamentus mensilis de su niu "Su Pippiu".
Agatais s'avisu intreu e is módulus po fai sa domanda in si situ internet de su Comunu de Barúmini:
***
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
