TeenHubs, unu progetu chi punnat a creai logus de acrescimentu e aundi podi fai amigàntzias e cuntatus nous po is giòvunus e is piciocheddus, e chi est giai ispaniendisí in totu sa Marmidda e fintzas in is biddas acanta, iat a bolli ammellorai sa manera chi tenint is prus giòvunus de s’arrelatai pari pari, agiudendi·ddus a cresci e a imparai cumpeténtzias nobas.
TeenHubs est pentzau po is giòvunus chi tenint prus de dexi/undixi annus, e finas a dexotu/dexennoi, chi bivint in is comunus de su Plus de Seddori (PLUS in italianu bolit narri “Piano Locale Unitario dei Servizi alla persona”), est a narri Barúmini, Forru, Furtei, Genuri, Gésturi, Is Pratzas, Lunamatrona, Pauli Arbarei, Seddori, Segariu, Samassi, Serramanna, Serrenti, Setzu, Siddi, Tuili, Turri, Ussaramanna, Biddanoa Franca, Biddanoa de Forru, Mara Arbarei, e iat a bolli circai de ddus fai partetzipai a sa progetatzioni e creatzioni de atividadis e de logus aundi ddas podi fai.
Esémpius de atividadis:
- eventus acapiaus a su logu, chi pòngiant in cuntatu is giòvunus cun su territóriu insoru;
- progetus piticus, percursus e labboratórius (artísticus, isportivus, culturalis, multimedialis e creativus, atividadis chi serbint a s’ispreviai, a fai amigàntzia e iscàmbius interculturalis e multigeneratzionalis, a s’avaloramentu de s’imaginatzioni e de sa capacidadi de creai) chi ant a progetai is giòvunus etotu;
- favoressi sa partetzipatzioni de totus, cun prus cunsideru a is chi arriscant de s’agatai in discumbénia e esclusioni sotziali;
- creai unu percursu de valutatzioni e de comunicatzioni de is resurtaus de su progetu.
TeenHubs donat a is piciocus sa possibbilidadi de si intendi líbberus de podi contai is bideas e is pentzamentus insoru, is sentidus e is bisóngius chi tenint; in prus ddis donat sa possibbilidadi de detzidi po su chi pertocat sa vida insoru e de èssiri pigaus prus in cunsideru (cumenti iscritu in s’artículu 12 de Sa Conventzioni ONU asuba de is Deretus de sa Pipiesa e de sa Giovunesa).
In su primu tretu de su progetu s’ant a isceberai is giòvunus chi tenint prus abbisóngiu e funt prus adatus e, pustis de ndi ai arregortu is iscritzionis, s’at a cumentzai su segundu tretu, po cuncordai su chi nci at de fai.
In custu primu tretu ant a èssiri incarreraus is percursus temàticus atualis chi podint èssiri prus de importu po is giòvunus, istudiendi is bisóngius insoru e arregollendi is bideas de issus etotu.
Esémpius de progetus: Fraigaus su benidori (labboratóriu tzívicu), Fai progetus po sa bidda (urbanística e logus comunus), Innovatzioni digitali (tecnologias noas); Atividadi física e benèssere (labboratóriu isportivu), Eco-tzitadinus (ambienti e sustenibbilidadi), Nodas de creatividadi (música), Espressioni urbana (arti de istrada), Acapiaus·sí impari (comunicatzioni e retzas sotzialis).
Is progetus propónnius ant a pertocai is interessus chi ndi essint a pillu in sa fasi de animatzioni territoriali. Dónnia logu, cument’e dónnia atividadi e dónnia labboratóriu, at a rapresentai una tèssera de importu mannu in su mosàicu de s’acrescimentu personali, de s’imparu e in sa creatzioni de una comunidadi unida.
Po ndi isciri de prus asuba de su progetu e po partetzipai, bisitai: https:// teenhubs.it
***
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
