Su 19 de Martzu de dónnia annu in Sardigna, in Itàlia e in àterus istadus, est sa Festa de su Babbu.
Pruscatotu in is istadus católicus, est de su Mesu Evu chi s’afestat custa dí, ca est sa matessi dí chi afestaus fintzas a Santu Giusepi, su babbu putativu de Cristu Gesus. Is primmus a ddu afestai funt istétius is Mónacus Benedetinus, in is primmus annus de su Milli, e a pustis is Francescanus.
Est in sa segundu metadi de su 1800 chi sa Crésia iat proclamau a Santu Giusepi s’amparadori de totu is babbus de famíllia e patronu de sa Crésia Universali. Papa Leoni XIII iat narau ca Santu Giusepi fiat su mellus modellu po totu is babbus e un’esempru de amori e de cuncórdia po is isposus, e fintzas ca is nóbbilis depiant imparai de issu ita fiat sa dignidadi, e is arricus cali depiant èssiri is cosas diaderus de importu de disigiai.
Finas a candu no est essia sa Lei n. 54 de su 5 de Martzu 1977, in Itàlia sa dí chi s’afestat a Santu Giusepi, e duncas sa Dí de su Babbu, fiat una dí festiva. In àterus istadus, in Isvítzera o in Ispagna, po narri, est ancora aici. In su 2008 unus cantu políticus ant iscritu una pariga de disínnius de lei po torrai a ponni custa data cument’e dí festiva.
Santu Giusepi, sendi chi est sa cona de sa mellus bisura de unu babbu, in sa traditzioni amparat fintzas is órfunus, is giòvunas bagadias e is prus malassortaus. Est po custu chi a logus, in Sitzília po narri, costumant a cumbidai a prandi is prus póburus. In àterus logus, sa Dí de su Babbu est sa matessi dí de sa festa de s’acabbu de s’ierru: duncas, cument’e ritus po otenni bona sorti, abbruxant su chi no ant arregortu de su sartu e, in is pratzas, faint fogaronis chi tocant a ddus sartai a brínchidus.
Nosu de s’Ufítziu de Língua Sarda de su Progetu “Sa Marmidda chistionat in Sardu”, cun su Comunu de Tuiri impari a is Comunus de Barúmini, Gésturi, Is Pratzas, Setzu e Biddanoa Franca, po fai is norabbonas a totu is Babbus de Sardigna, eus pentzau chi sa cosa mellus siat de ddu fai cun una poesia in Língua Sarda. E chini mellus de Antiocu “Montanaru” Casula, unu de is prus poetas mannus e famaus de Sardigna, at cantau is Babbus? In s’imàgini acapiada “A babbu meu”.
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
