S’8 de Martzu, dónnia annu est sa Dí Internatzionali de is Dereteus de is Féminas: afestendi in custa dí, donaus importu mannu a is Féminas, a is deretus insoru e a is cumbatas chi ant dépiu fai po ddus otenni, a s’emancipatzioni, e arregordaus is cunchistas sotzialis, económicas e políticas, donendi prus cunsideru a chistionis che s’agualidadi de genia, is deretus asuba de s’isceberu de fai fillus, is partzialidadis e is aprofitamentus.
Est connota fintzas cument’e “Sa Festa de is Féminas”, ma sigumenti no seus fueddendi de una dí de festa cument’e totu is àteras, ma de una dí de arrexonu, intzandus iat a èssiri mellus a dda tzerriai, cumenti arrecumandant giai totus, sa “Dí internatzionali de is Féminas”.
In Itàlia, sa primmu borta chi eus tzelebrau sa Dí Internatzionali de is Féminas est istétiu in su 1922, perou su 12 de Martzu. Sa data de s’8, cumenti si fadiat giai in àteras Natzionis, dd’iat isceberada s’Unioni de is Féminas in Itàlia (UDI) impari a unus cantu partidus políticus (PCI, PSI, Partito d’Azione, Sinistra Italiana e Democrazia del Lavoro) in su 1945.
De s’annu a pustis, acabbada sa Gherra Mundiali, sa Dí Internatzionali de is Féminas dd’ant afestada in totu s’Itàlia, e ant isceberau su frori de sa mimosa cument’e símbulu, poita ca in custu períodu dda podeus agatai bella che froria giai in dónnia logu.
In cussus annus, perou, a sa Dí Internatzionali de is Féminas no ddi donànt grandu cunsideru: est de is Annus Setanta isceti chi dd’ant donau importu mannu, gràtzias a su chi ant fatu is de su Movimentu Feminista.
Nosu de s’Ufítziu de Língua Sarda de su Progetu “Sa Marmidda chistionat in Sardu”, cun su Comunu de Tuiri impari a is Comunus de Barúmini, Gésturi, Is Pratzas, Setzu e Biddanoa Franca, po fai is norabbonas a is Féminas, e pruscatotu po ddis torrai gràtzias po su chi ant fatu, su chi faint e su chi ant a fai po ammellorai su mundu anca biveus, eus pentzau chi no ddoi siant fueddus prus bellus che is de is Féminas etotu.
Duncas, eus isceberau unas cantu Poesias de Iscritoras Sardas chi, donniuna a sa manera cosa sua, ant cantau e contau is Féminas.
Ddas podeis ligi in is imàginis acapiadas. Isperaus chi si praxant.
Si ndi connosceis àteras, chi pertocant is Féminas, si iat a praxi chi si ddas imbiais:
- in is cumentus de sa pàgina facebook: “Sa Marmidda chistionat in Sardu”
- a s’indiritzu de posta eletrónica: samarmiddachistionatsusardu@gmail.com
SA MARMIDDA CHISTIONAT IN SARDU - Progetu finantziau cun su dinai de sa Regione Autònoma de Sardigna cunforma a sa L. 482/99 e a sa L.R. 22/2018.
.png)
